Idees Tydskrif - Handwerk_en

Handwerk & Dekor

Omskep daardie spaarvertrekkie in 'n lieflike aantrekkamer met oorgenoeg pakplek vir al jou klere, skoene en bykomstighede.

Die probleem
Hierdie vertrek, wat te klein is vir 'n slaapkamer, was 'n redelike kopseer vir die eienaar. Hoewel sy dit as studeerkamer gebruik het, wou sy graag iets besonders daarmee doen, maar sy het nie werklik geweet wat nie.

Die oplossing
'n Gebrek aan pakplek in haar klerekas het uiteindelik gelei tot die inspirasie vir hierdie pragtige aantrekkamer waar al haar klere, skoene en bykomstighede netjies gebêre word.

Die terracotta-teëls is wit en swart geverf en spieëls met vroulike lyne is teen die mure opgesit om die sterk kontraste te versag.

Voor

Ingeboude rakke
'n Projek soos dié moet liefs deur 'n professionele skrynwerker aangepak word, maar indien jy of jou man kans sien om dit self te doen, moet julle die volgende in gedagte hou:

Dink prakties wanneer jy die ontwerp doen. Waarvoor gaan die stoorplek gebruik word? Watter tipe rakke en hangplek is nodig en hoe groot moet die spasies vir elk wees?

Maak eers rofweg sketse van die uitleg en die grootte en posisie van die rakke en hangplek. Hou die uitleg van die vertrek in gedagte, soos die ligging van die vensters en deure en die gebruik daarvan.

Teken jou finale ontwerp volgens skaal. Dit moet al die werklike mates, byvoorbeeld die lengte van mure en die afmetings van elke rak, aandui. Onthou om die dikte van die hout wat jy gaan gebruik, in ag te neem wanneer jy die mates uitwerk.

Die meeste ysterwarewinkels kan die hout vir jou saag, maar jy sal 'n afskrif van jou ontwerp met al die mates wat duidelik daarop aangedui is vir hulle moet gee. Dui ook duidelik aan watter dele teen 'n hoek gesaag moet word. Handelaars wat dié diens bied, het gewoonlik 'n vorm waarop jy al hierdie inligting moet invul. Sorg dus dat al die mates en snyvlakke reg ingevul is en vergelyk weer die gesaagde hout met jou lys om seker te maak dat alles reg pas voor jy begin bou.

Skroef eers die onderskeie stukke aan mekaar vas voor jy dit in die muur vasskroef. Maak seker dat dit deur die deur sal pas voor jy te ver vorder. Hou altyd jou oorspronklike ontwerp byderhand sodat jy dit kan raadpleeg soos nodig.

Muur van spieëls

Om 'n spieël in 'n vorm te sny is 'n redelik gespesialiseerde werk en nie alle glasverskaffers doen dit nie. Jy sal dus moet rondvra om iemand te kry, maar dit sal die moeite werd wees. Teken die vorms wat jy wil hê in die regte grootte op papier.

Vra die verskaffer om die spieëls presies so te sny en om die rande te beveilig. Hy kan die rande selfs skuins sny vir 'n meer dekoratiewe afwerking, maar dit kos nogal heelwat. Gebruik die papierpatrone om die posisies van die spieëls teen die muur te bepaal en plak dit dan met spieëlplakband vas.

Blokkiesvloer

Omskep terracotta-teëls in 'n swart-en-wit blokkiesvloer. Sorg dat die vloer skoon en droog is, en gebruik dan 'n sponsroller om 'n laag Alcolin Permobond oor die hele vloer te verf. Dit seël die teëls en skep 'n basis waarop die verf kan kleef. Laat dit goed droog word en verf dan die teëls met wit en swart Plascon-vloerverf. Gebruik 'n roller om 'n mooi afwerking te kry.

Koop die April 2010-uitgawe vir aanwysings vir van die ander projekte in hierdie vertrek.

Verwante artikels
Aantrekkamer vir 'n man

Jou eie klein boudoir

[1 Kommentaar]

Sê jou sê
Naam	E-posadres

Kommentaar

Tik asseblief die verifikasiekode in.

Handwerk & Dekor blogs

Earthbutter Beads

Gas-blogger Sarah Barnhoorn van Babazeka skryf oor 'n besigheid wat juweliersware maak van handgemaakte krale.

Handwerk & Dekor

Handwerk & Dekor blogs

Soek alle Handwerk & Dekor artikels

Mees populêr