Einde laas jaar was ek gelukkig genoeg om twee dae in Durban deur te bring saam met Vyf Rose en hul mense. Ek het gewonder of tee dan nou rêrig so interessant kan wees dat mens vir twee dae daaroor kan praat. Ek is wel 'n groot teeliefhebber, maar ek het nie gedink dat daar soveel werk in elke koppie gaan nie. 

Ons is eerste na die fabriek in die middestad. Hier word die tee gemeng, in sakkies geseël en verpak. Dinesh, Vyf Rose se teemeester (kyk vir sy naam op elke pakkie Vyf Rose), het ons daar ontmoet en na die laboratorium geneem waar hy en sy assistente die tee meng. Nes ek, wonder julle seker nou hoekom dit nodig is om tee meng? Wel, dis waar die kuns en tegniek inkom. 

Dinesh het verduidelik elke keer wanneer nuwe tee gemaak word, moet dit van voor af gemeng en geproe word. Elke resep is dus ook anders. Die blare wat hulle ontvang is elke liewe keer anders as die vorige keer, en dan kry hulle nog blare van sowat 15 verskillende teeplantasies in lande soos Suid-Afrika, Kenia en Malawi. Elke bietjie reën en droogte, son en wolke beïnvloed die tee. Die grond maak ook 'n verskil aan die smaak, kleur en sterkte van die tee. Nou verstaan julle seker hoekom 'n hele span mense moet seker maak dat elke koppie dieselfde smaak.

Hier maak die vrouens vir ons tee sodat ons die verskillende plantasies se tee kan proe. Elke bakkie word op presies dieselfde manier gemaak om 'n standaard te handhaaf.

Die tee word van die lepel afgeslurp en dadelik uitgespoeg, nie soos wynproe waar mens eers die wyn in jou mond rondspoel nie. Hul smaak is so sensitief dat hulle van hier af kan begin meng om dieselfde smaak te kry as die kontrole-tees van vorige mengsels. Dis nie iets waarvoor jy kan gaan leer nie. Dit is jare se werk en waarneem van ander teemeesters om self een te kan word.

Ons het ook die kans gekry spesialiteitstees soos Darjeeling, gerookte tee en Chinese "blooming" of "flowering" tee te proe. Laasgenoemde het pragtige name soos Flying to the moon, Oriental beauty en Lily fairy.

Kyk net hoe pragtig!

Ons is daarna bederf met 'n 5-ster-Afrika- high tea by die hotel. En was dit nie 5-ster nie! Die pikantste happies en mooiste soetgoedjies. Dié tema sluit aan by die nuutste tee van Vyf Rose, naamlik die Select African Blend. Dis sterker en donkerder in kleur met 'n meer aardse smaak - nes die kontinent. 

"Mmm, wat is daai?"

Die volgende dag het ons die lang pad deur die Middelland aangedurf na die Ntingwe-teeplantasie. Dis een van die plantasies waarvandaan Vyf Rose teeblare kry. Ongelukkig het die weer nie so lekker saamgespeel nie. Die laaste stukkie pad was baie modderig en met baie dik mis en baie water was dit nie verbasend dat ons vasgesit het nie. Dit het bygedra tot die avontuur en ons het lekker gelag!

Nadat almal se hare al windverwaai en ons wimpers vol wit doudruppels was, is ons bussie met behulp van die plaastrekker uitgesleep en ons het uiteindelik by die plantasie aangekom. Dis hier waar ons kon sien hoe tee werklik gemaak word. 

Die teeblare word elke paar dae gepluk - net die boonste paar blaartjies - en word in hierdie lang sementtrôe gesit. Vrouens gooi die blare deur 'n masjien, wat die blare fyn opsny, en van daar gaan dit op die vervoerband. 

Soos dit deur die proses gaan, verkleur die blaartjies van groen na bruin soos dit oksideer. Hitte help hiermee en ook om dit uit te droog. Dit gaan gereeld deur rollers om dit los te maak van mekaar. 

Hier word dit in die droër opgeneem. Warm lug blaas oraloor die blaartjies en so word dit droog. 

Uit die droër, op nog 'n vervoerband, deur rollers wat staties is. So word al die harder stukkies, soos die takkies van die blare, uitgewerk. Daar waai orals teeblaartjies rond!

Dromme met verskillende groottes siwwe skei die blaartjies. Die verskillende groottes word apart gehou en ook so verkoop, aangesien die grootte van die blare die uiteindelike smaak van die tee beïnvloed: Die kleinste stukkies maak byvoorbeeld dat die tee sterker is, maar kan nie in los teeblare verkoop word nie. 

Hier is die pakhuis waar die teeblare in sakke gehou word. Dit gee nuwe betekenis aan die woord "teesakkie"!

Met 'n warm koppie Vyf Rose Earl Grey langs my op die lessenaar dink ek terug aan 'n fantastiese tyd en hoe baie ek geleer het. Ek neem 'n slukkie en dink aan die mense wat so hard gewerk het om my middagkoppie tee te maak. Met al die nuwe kennis is ek beslis 'n groter teeleifhebber en drink met baie meer liefde en waardering elke koppie.

Dankie aan Vyf Rose en Match Creative Resource Agency vir die wonderlike ondervinding!