Idees Tydskrif - Jou

Jou Lewe

As jy sonder enige rede gewig begin verloor, en geïrriteerd en altyd moeg voel, is jy dalk 'n diabeet. Gelukkig kan jy dit beheer deur reg te eet.

Meer as 1,5 miljoen Suid-Afrikaners is diabete - en die helfte van hulle weet dit nie. Dikwels is dit omdat ouderdom die skuld kry vir baie van die simptome, byvoorbeeld dowwe visie en toenemende moegheid.

Hoewel diabetes nie genees kan word nie, is die goeie nuus dat dit baie goed beheer - en selfs voorkom - kan word.

Wat is diabetes?
Ons liggaam het insulien nodig sodat ons suiker kan gebruik vir energie. Diabetes ontstaan wanneer te veel suiker in die bloedstroom opbou omdat die liggaam se vermoë om insulien te vervaardig, afneem.

'n Mens kry drie soorte diabetes: Tipe 1, Tipe 2 en swangerskap-diabetes.

Tipe 1-diabetes
Tipe 1-diabetes ontstaan as die pankreas nie meer insulien vervaardig nie. Omdat daar geen insulien in die bloedstroom is nie, beteken dit jy is insulien-afhanklik en moet jouself daarmee inspuit.

Tipe 2-diabetes
By Tipe 2-diabetes is daar wel insulien in die bloedstroom, maar die liggaam kan dit nie doeltreffend gebruik nie en dit bou op in die bloed.

Swangerskap-diabetes
Dit is 'n tydelike toestand wat soms tydens swangerskap ontstaan, veral as daar oormatige gewigstoename is. Hoewel die simptome dikwels ná die geboorte van die baba verdwyn, is swangerskapdiabetes 'n teken dat jy later in jou lewe dalk Tipe 2-diabetes kan ontwikkel. As jy dus swangerskapdiabetes gehad het, moet jy noukeurig let op jou dieet en meer aktief raak om te voorkom dat jy later 'n diabeet word.

Faktore wat jou in gevaar stel

Oorgewig
Hoë bloeddruk en hoë cholesterol
'n Ouer, broer of suster met diabetes
Diabetes tydens swangerskap

Tekens en simptome
As diabetes nie behandel of goed beheer word nie, kan dit lei tot komplikasies soos hart-, nier- en oogsiektes asook skade aan die senuwees. Hoe weet jy dus as jy diabetes het?

As jy van die volgende simptome toon, moet jy jou huisdokter raadpleeg om seker te maak dis nie diabetes nie. Hoe vroeër diabetes gediagnoseer word, hoe vinniger kan opgetree word om dit te beheer en sodoende kan jy komplikasies keer of uitstel. Van die tekens sluit in:

Is heeltyd dors
Wil dikwels urineer
Gewigsverandering (optel of verloor)
Erge moegheid of gebrek aan energie
Dowwe visie
Baie infeksies of infeksies wat oor en oor voorkom
Sny- en kneusmerke wat lank neem om te genees
Tintelende gevoel of lamheid in hande of voete

Wil jy meer weet?
Gaan na http://www.diabetessa.co.za/.

Verwante artikels
Kleurvolle roerbraai en koeskoes

Alles wat jy wil weet oor lae-GI

Lamsvleis-en-boontjiebredie

[0 Kommentaar]

Sê jou sê
Naam	E-posadres

Kommentaar

Tik asseblief die verifikasiekode in.

Jou Lewe blogs

Oor lughawens, ’n foutiewe blik-stem en nog stories …

Partykeer is dit die moeite werd om ver te ry agter ’n goeie storie aan. Hier by ons doen ons dit nie gereeld nie, maar toe ek Merewyn de Heer se juweliersware by die Design Indaba se ekspo sien, het ek net geweet ek moet eenvoudig iets oor haar doen. Dus het ek aan die werk gespring en die internet ge-surf, en nie lank daarna nie het ons ’n datum gereël vir ’n shoot. Die enigste vereiste van die grootbaas hier was bring meer as een storie terug.

Jou Lewe

Jou Lewe blogs

Soek alle Jou Lewe artikels

Mees populêr